Iċ-Charter support Unit (CSU) għandu f’idejh l-inizjattiva tal-Quality Service Charters. Il-Unit iħaddem ukoll il-faċilità Servizz.gov.mt.

Dipartimenti u uffiċċji tal-Gvern li jippubblikaw Quality Service Charters jintrabtu li jilħqu livelli stabbiliti f’dak li hu għoti ta’ servizz. Qabel ma jippubblika ċ-charter tiegħu, kull dipartiment jew uffiċċju janalizza fid-dettall il-kwalità tas-servizz li joffri u l-fatturi ewlenin li jinfluwenzawha, anke bl-użu ta’ għodod bħalma huma l-customer surveys, u b'hekk jara fejn hemm lok għal titjib. Ir-rwol taċ-Charter Support Unit hu li jagħti pariri u għajnuna lid-dipartimenti involuti fil-proċess.

Is-CSU jissorvelja l-progress tad-dipartimenti u l-uffiċċji li jkunu ppubblikaw charters u jqabblu ma’ dak li jkunu ntrabtu li jwettqu fiċ-charters tagħhom. Dan jagħmlu billi jikkommissjona audits interni, li bħalissa qed isiru mid-Direttorat tal-Awditjar Intern u Investigazzjonijiet. Is-CSU mbagħad ikompli jsegwi r-rapporti ta’ l-audit mad-dipartimenti kkonċernati.

Il-Unit jippromwovi l-inizjattiva taċ-charters fost l-impjegati tas-Servizz Pubbliku li fl-aħħar mill-aħħar għandhom ir-responsabbiltà biex kull charter jirnexxi.

Aktar tagħrif dwar l-inizjattiva tal-Quality Service Charters, kif ukoll it-test taċ-charters kollha li ġew ippubblikati s’issa, jinstab fil-website taċ-Charter Support Unit.

Iċ-Charter Support Unit iservi wkoll bħala ċentru fejn jintlaqgħu it-talbiet, l-ilmenti u s-suġġerimenti mibgħuta mill-pubbliku permezz tal-faċilità Servizz.gov.mt (www.servizz.gov.mt). Kull talba tiġi mgħoddija mill-Unit lill-ministeru jew lill-entità pubblika risponsabbli biex tieħu azzjoni skond il-każ.

Iċ-Charter Support Unit jirrapporta direttament lid-Direttur, Staff Development Organisation.