Id-Direttorat għall-Affarijiet tad-Difiża twaqqaf biex isaħħaħ u jkompli jiżviluppa l-funzjoni ta’ ministeru tad-difiża li għandu l-Uffiċċju tal-Prim Ministru. Din il-funzjoni ilha teżisti, kważi mingħajr interruzzjoni, mill-1964. Ir-responsabbiltajiet ewlenin tad-Direttorat huma:

• li jagħti pariri imparzjali u tekniċi dwar twettiq ta’ policies kif ukoll jagħmel analiżi ta’ l-aspetti kollha li għandhom x’jaqsmu ma’ affarijiet militari u li jaffettwaw il-politika tal-Gvern dwar id-difiża;

• li jsegwi u janaliżża t-twettiq tad-deċiżjonijiet tal-Kabinett u l-politika tal-Gvern dwar affarijiet tad-difiża, u jirrapporta dwar jekk il-miri tal-Gvern f'dan il-qasam intlaħqux;

• jiżviluppa iniżjattivi u ideat ġodda bil-għan li jitjieb l-operat, il-loġistika u l-amministrazzjoni tal-Forzi Armati;

• li flimkien mal-Ministeru ta’ l-Affarijiet Barranin, jiżviluppa relazzjonijiet bilaterali u multilaterali ma’ ministeri tad-difiża ta’ pajjiżi oħra u ma’ organizzazzjonijiet internazzjonali.