L-Istaff Development Organisation (SDO) hi l-aġenzija ċentrali tat-taħrig tas-Settur Pubbliku.

Il-qafas tal-ħidma ta’ dan id-dipartiment hu: li jieħu ħsieb, u fejn hu possibbli, jorganizza attivitajiet u jipprovdi għajnuna għall-iżvilupp tal-individwu f’dak kollu relatat mat-taħriġ. Dan kollu bil-għan li s-servizz pubbliku jkun aktar effiċċjenti u jwassal bl-iktar mod professjonali l-policies li jiġu mfassla mill-gvern lejn iċ-ċittadin Malti.

L-iskop ewlieni tal-SDO hu li jrawwem kultura li tagħti importanza lit-taħriġ fis-Servizz Pubbliku. Fi kliem ieħor, id-dipartiment mhux biss jieħu ħsieb li joffri programmi ta’ taħriġ matul is-sena, imma jirregolarizza l-funzjoni tat-taħriġ u l-effett pożittiv li din tħalli fuq l-aspett maniġerjali tas-Servizz Pubbliku.

Apparti l-funzjoni li jipprovdi taħriġ fuq livell ċentrali dan id-dipartiment għandu rwol importanti li jiżviluppa l-kapaċitajiet eżistenti tar-riżorsi umani fi ħdan is-Servizz Pubbliku. Dan kollu jwassal sabiex is-Servizz Pubbliku itejjeb id-dehra tiegħu u jniżżel fiduċja kontinwa lejh miċ-ċittadin Malti. L-istrateġija li tagħmel dan kollu possibli hi bbażata fuq il-kunċett ta’ deċentralizzazzjoni tar-riżorsi umani flimkien mal-istatus ta’ Malta bħala membru fl-Unjoni Ewropeja. L-SDO hu wkoll responsabbli miċ-Charter Support Unit.

L-SDO jorganiżża firxa wiesa’ ta’ programmi ta’ taħriġ għall-impjegati kollha tas-Servizz Pubbliku. Dawn jinkludu taħriġ fl-oqsma maniġerjali, teknoloġija tal-informatika, Unjoni Ewropeja, lingwi kif ukoll taħriġ lill-uffiċċjali li jkunu promossi minn żmien għal zmien.

Waqt li hemm numru ta’ programmi ta’ taħriġ li jiġu mmexxija mill-istaff tal-SDO, hemm oħrajn li jingħataw minn organizzazzjonijiet lokali, u f’ċertu każijiet, anke minn barranin. L-SDO joffri wkoll l-għajnuna tiegħu lil Ministeri u Dipartimenti meta jkunu jridu pariri dwar taħriġ barra minn Malta, fosthom opportunitajiet ta’ skambju ma ‘ istituzzjonijiet barranin. Dan id-dipartiment jieħu ħsieb wkoll skemi ta’ sponsorships fejn uffiċjali pubbliċi jgawdu minn opportunitajiet li javvanzaw l-istudji akkademiċi tagħhom, fost l-oħrajn permezz ta’ Masters Degress Awards. L-SDO huwa membru u jikkollabora mill-qrib ma’ diveri organizzazzjonijiet tat-taħriġ, kemm lokali u barranin. Dan kollu jgħin sabiex l-SDO jitqies bħala dipartiment fundamentali li jsaħħaħ ir-rwol tat-taħriġ f’kull qasam tas-Servizz Pubbliku.

Sa mill-2005, iċ-Charter Support Unit ġie inkorporat mal-SDO.

Aktar tagħrif jinstab fil-website ta’ l-Istaff Development Organisation.