Is-Servizz Pubbliku huwa l-qalba tal-mekkaniżmu permanenti li bih il-Gvern jamministra l-pajjiż. Il-missjoni tas-Servizz Pubbliku hi li:

• Jagħti pariri dwar policy lill-Gvern

• Iwettaq il-policies tal-Gvern u jamministra l-liġi b’mod effiċjenti u effettiv

• Joffri servizzi lill-pubbliku b’imparzjalità, b’korteżija u mingħajr żbalji.

Is-Servizz Pubbliku hu parti mill-qasam usa’ tas-settur pubbliku, imma t-tnejn m’humiex l-istess ħaġa. L-impjegati tas-Servizz Pubbliku (jew kif jissejħu fil-liġi, uffiċjali pubbliċi) huma ngaġġati taħt l-awtorità tal-Kummissjoni għas-Servizz Pubbliku, ġeneralment iservu fil-ministeri u d-dipartimenti tal-Gvern, u huma suġġetti għal qafas komuni ta’ regoli.

Is-settur pubbliku jinkludi wkoll korporazzjonijiet pubbliċi, awtoritajiet imwaqqfin skond il-liġi, u entitajiet oħra li m’humiex parti mis-Servizz Pubbliku. Ngħidu aħna, għalliema fi skejjel statali huma uffiċjali pubbliċi; lecturers fl-Università m’humiex. Il-Korp tal-Pulizija wkoll hu parti mis-Servizz Pubbliku, imma l-Forzi Armati ta’ Malta le.

F’dawn l-aħħar għaxar snin is-Servizz Pubbliku għadda minn programm estensiv ta’ riformi bil-għan li jsir aktar effiċjenti u aktar kapaċi jwieġeb għall-ħtiġiet tal-Gvern u tal-pubbliku. Is-Servizz kien minn ta’ quddiem f’Malta fl-użu ta’ l-informatika. Is-Servizz għandu infrastruttura teknoloġika mill-aktar avvanzata u li serviet ta’ bażi biex fuqha jinbena l-electronic government. Grazzi għal dan l-investiment fl-informatika, kif ukoll għall-inizjattiva tal-Quality Service Charters, il-livell tas-servizz offrut lill-pubbliku qed jitjieb. Uffiċċjali pubbliċi għolja jinħatru fil-karigi tagħhom għal żmien limitat li jista’ ma jiġġeddidx jekk dawn l-uffiċjali ma jiksbux riżultati konkreti fil-qadi ta’ dmirijiethom.

Is-Servizz Pubbliku joffri lill-impjegati prospettivi ambjent tax-xogħol dinamiku b’varjetà ta’ xogħol u b’potenzjal għall-iżvilupp personali li ma ssibx bħalhom fil-pajjiż.

Ir-riformi għadhom għaddejjin, imma s-Servizz Pubbliku diġà wera li hu kapaċi jadatta ruħu u jikseb ir-riżultati mistennija minnu. Ngħidu aħna, is-sħubija ta’ Malta fl-Unjoni Ewropea ħolqot volum qawwi ta' xogħol fil-ministeri u d-dipartimenti sew qabel u sew wara l-isħubija.  Is-suċċess li bih twettaq dan il-programm juri li l-uffiċjali pubbliċi Maltin kapaċi jħabbtuha ma’ uffiċjali ta’ kwalunkwe pajjiż Ewropew. Dan ħareġ ċar ukoll fil-laqgħat li jkollhom uffiċjali pubbliċi Maltin fi Brussels u mkejjen oħra.

Il-bidla hija proċess kontinwu u liġi li bħalissa qegħda quddiem il-Parlament tipproponi żviluppi ġodda.  L-abbozz imsejjaħ Att dwar l-Amministrazzjoni Pubblika taħseb biex issaħħaħ it-tmexxija tas-Servizz Pubbliku u tintroduċi iżjed flessibilità fl-immaniġġjar tad-dipartimenti tal-Gvern. L-abbozz jipproponi qafas legali għall-organizzazjoni u l-immaniġġjar tas-Servizz. L-abbozz jipprovdi għal:

• it-tisħiħ tat-tmexxija tas-Servizz Pubbliku, b’definizzjoni ċara tas-setgħat tas-Segretarju Permanenti Ewlieni u tas-Segretarji Permanenti individwali;

• devoluzzjoni tas-setgħat ta’ tmexxija lill-kapijiet tad-dipartimenti, taħt l-iskrutinju tal-Kummissjoni dwar is-Servizz Pubbliku;

• il-ħolqien ta’ Servizz Eżekuttiv Anzjan li se jiġbor fih il-managers anzjani kollha fis-Servizz.

L-abbozz telenka l-valuri ta’ l-amministrazzjoni pubblika u tagħti bażi legali lill-Kodiċi ta’ Etika għall-impjegati pubbliċi. L-abbozz jagħmilha ċara li sew il-valuri u sew il-Kodiċi huma nforzabbli permezz ta’ proċeduri ta’ dixxiplina. Fih dispożizzjoni wkoll dwar il-ħarsien ta’ min jirrapporta abbużi min-naħa ta’ mpjegati oħra.

L-abbozz japplika wkoll għall-entitajiet pubbliċi li mhumiex parti mis-Servizz Pubbliku. Jispeċifika li l-valuri ta’ l-amministrazzjoni pubblika u l-Kodiċi ta’ Etika japplikaw għal dawn l-entitajiet. Joħloq Kummissjoni għall-Ħarsien tal-Mertu li għandu jara li l-ħatriet f’dawn l-entitajiet jimxi skond il-prinċipju tal-mertu. L-abbozz jaħseb ukoll għall-ħolqien ta’ aġenziji, li huma forma ġdida ta’ organizzazzjoni li tgħaqqad il-flessibilità maniġerjali ma’ mekkaniżmi b’saħħithom ta’ kontabilità.